محمد اشرف, 26 عاماً - مصر

4/13/2012 1:45:24 AM - المشاهدات (1067) - أضف تعليق على هذه المشاركة

فى البدايه احب اقول انى والله العظيم قولت لصاحبى فى شهر 10 2010 ان مستحيل الشعب يسكت على مجلس الشعب و الهبل ده و قولتلو استنى فى اول 2011 عاللى هيحصل
انا 19 سنه من حلوان

خلصت امتحانات يوم 22 يناير 2011 و كنت متابع الفيس و اسمع كلام عن بن على انو هرب لكن بصراحه مركزتش فى الكلام ده
فوجئت بدعوات للنزول يوم 25 يناير ظروفى ساعتها مكانتش كويسه و كنت شغال
روحت شغلى 23 و 24 و 25 لحد يوم 27 و كنت لما ارجع اشوف الاخبار و الجزيره على طول مفتوحه لحد الجمعه 28
قولت مستحيل اسيب كل اللى بيحصل ده نزلت من بيتنا عشان اصلى الجمعه صليت و قابلت واحد صاحبى
و طبعاكانت حلوان كلها عربيات امن مركزى و بوكس
قولتلو احنا هنعمل ايه قالى اصبر بعد الصلاه هنتجمع
استنينا و صلينا و كل واحد قلبو مع اللى فى التحرير
المسجد اللى صلينا فيه فى شارع اسمو جمال عبد الناصر فى حدائق حلوان و هو قريب من الكورنيش
لقينا الناس بتتجمع لوحدها و المظاهره بتكبر منغير دعوه و منغير نظام
و اتجهنا نحية الكورنيش رايحين للتحرير
مفيش ميكروباصات ولا عربيات و الكورنيش مقفول
هنمشى !!
مشينا و توكلنا على الله كل ما نعدى على منطقه نزيد
نعدى على شارع نزيد سبحان الله اللى كان مخلينا واحد فى اليوم ده مشينا وصلنا للمعصره زيدنا بشكل رهيب
الكلام ده كان حوالى الساعه 4
كملنا لحد ما وصلنا طره
قبل السجن بشويه لقينا ناس راجعين و قالو ان فيه ضرب و كان فاضل على السجن حوالى 3 كيلو
كل المظاهره جريو نحية السجن وصلنا هناك فى شارع جنب السجن كان واقف فيه الامن المركزى
و كانو بيضربو غاز فوجئت ان فى قنبله اترمت جنب رجلى
مكونتش اعرف يعنى ايه غاز مسيل للدموع كنت فاكر ان عينى هتدمع بس
فوجئت بشلل فى انفى و مش قادر اخد نفسى و عينيا عماله تدمع ولا عارف اقفلها ولا افتحها
كل ده فى ثانيه واحده لفيت عشان اهرب منها و لفيت تانى اخدتها و رميتها عليهم و ارتفع الهتاف سلميه
و الناس قالو اقعدو فى الارض و قعدنا كلنا قدام الامن المركزى و هما هديو شويه لكن مفيش دقيقتين و ابتدو يضربو بكثافه شديده
كان كل الضرب عندنا مطاط و غاز بس
و ابتدينا نهاجمهم و كر و فر
و هما يضربو و يطلعو خطوه قدام و الناس تاخد القنابل ترميها فى النيل او يحدفوها عليهم تانى لحد ما الامن المركزى طلع و بقى على الكورنيش معانا
و اتقسمنا شويه و شويه و بينهم الامن المركزى
حوالى الساعه 6
و ابتدى الضرب المطاطى يزيد و ناس لابسين مدنى بيضربو و بيشدو الناس من وسطينا
و اى حد يشم غاز المتظاهرين يجيبولو بصل و خل و بيبسى و خميره و يسعفوه و يشيلوه يبعدوه
كنت انا و صاحبى واقفين قدام الامن المركزى و عشان نرجع بيتنا لازم نعدى من الامن
قولتلو ننزلنعدى من عند النيل قال لا فغمضت عينى و قفلت انفىو فمى و جريت عديت الامن و استنين صاحبى وهو بيجرى مستحملش الغاز اتضرب رصاصه مطاطى فى رجلو قام واحد فى اقل من ثانيه شايلو و موصلو لحد عندى و روحنا
فى النهايه مهما اقول عمرى ما اقدر اوصل 1% من حقيقة اليوم ده
و احب اقول ان هدفنا مكانش اننا نهرب المساجين
احنا كان هدفنا نحمى السجن و عشان كده محدش طلع منو و الحمد لله
و كان هدفنا التانى اننا نحسسهم ان فى ضغط على الامن اللى عند السجن فيسحبوا من اللى فى التحرير و نخفف الضغط على الناس اللى هناك

Bookmark and Share

التعليقات على 28 يناير جمعة الغضب

هذه المشاركة لا تحتوي على تعليقات.

كن أول شخص وأضف تعليق على هذه المشاركة الآن!

أضف تعليق على هذه المشاركة

تابع وشارك ثورة 25 يناير على صفحتك في فيسبوك وتويتر الآن: